У нядзелю, 4 траўня, памерла шматгадовая вядоўца савецкага і беларускага радыё і тэлебачання Кацярына Ягорава (Несцяровіч). Ёй было 79 гадоў.
Кацярына Несцяровіч (пасля замужжа — Ягорава) нарадзілася 21 сакавіка 1946 года ў вёсцы Буі Лёзненскага раёна Віцебскай вобласці. Выхоўвалася мамай і бабуляй. Пасля заканчэння школы працавала прадавачкай, бухгалтаркай, сакратаркай райвыканкама, лабаранткай у хімічнай лабараторыі, паралельна ўдзельнічаючы ў канцэртах самадзейнасці.
На запрашэнне знакамітага беларускага хормайстра Генадзя Цітовіча, хор якога аднойчы выступіў у Лёзна, пераехала ў Мінск і стала спачатку вядоўцай канцэртаў хору, а потым — яго салісткай. У 1975 годзе на Беларускім тэлебачанні прайшоў конкурс дыктараў, дзе са 150 прэтэндэнтаў выбралі дваіх, сярод іх была і Кацярына. У красавіку 1976 года яна ўпершыню выйшла ў эфір і агучвала навіны больш за 20 гадоў. Таксама яна вяла на тэлебачанні праграму «Запрашаем на вячоркі», прысвечаную фальклору.
Паралельна з 1989 года Ягорава працавала дыктаркай на Беларускім радыё. Таксама яна была вядоўцай радыёканала «Культура» і канцэртнай залы Белдзяржфілармоніі.
Пасля сыходу з радыё (гэта здарылася ў другой палове нулявых, як мяркуюць сябры вядоўцы, да 2010 года) Ягорава працавала над агучкай аўдыёкніг. Напрыклад, у яе выкананні можна пачуць «Людзей на балоце» Івана Мележа. Таксама яна агучвала творы Янкі Брыля і Алеся Адамовіча.