У вёсцы Мядзельскага раёна адбылася гісторыя, якая нагадвае трылер: двое вяскоўцаў дзеля старой залатой манеты катавалі свайго знаёмага. Той усё роўна не сказаў ім, дзе яна ляжыць, нягледзячы на збіццё палкай і прыкладанне гарачага праса, паведамілі ва ўпраўленні Следчага камітэта па Мінскай вобласці.
Увечары 15 траўня двое жыхароў вёскі Брусы 45 і 47 гадоў выпівалі ў гасцях у знаёмага. За размовай яны ўспомнілі, што іх 40-гадовы аднавясковец некалькі гадоў таму знайшоў у лесе дзве залатыя дзесяцірублёвыя манеты 1899 года з выявай расійскага імператара Мікалая ІІ. Праз год пасля ўдалай знаходкі ён папрасіў аднаго з прыяцеляў дапамагчы з продажам аднаго чырвонца, але той яго згубіў. Мужчыны вырашылі пайсці да яго і даведацца, ці засталася другая манета, каб забраць каштоўнасць сабе і выгадна прадаць.
Кошт такіх манет на аўкцыёнах — каля 2−3 тысяч рублёў.
Калі мужчыны прыйшлі да аднавяскоўца дадому, той спаў. Налётчыкі абвінавацілі яго ў крадзяжы металу і пачалі патрабаваць манету як кампенсацыю — ён адмовіўся. Тады гаспадара дома пачалі збіваць кулакамі і палкай, але гэта таксама не спрацавала. Нарэшце візіцёры вырашылі выкарыстаць прас.
«Зламыснікі падключылі бытавы прыбор у электрычную разетку і, прыкладаючы да грудзей, жывата і твару ахвяры гарачы прас, патрабавалі расказаць, дзе знаходзіцца рэліквія. Аднак і такім спосабам ім не ўдалося дамагчыся жаданага. Нягледзячы на зверскія катаванні, пацярпелы не расказаў пра месца захоўвання каштоўнасці, і, застаўшыся ні з чым, налётчыкі ўцяклі з месца злачынства», — расказалі ва УСК.
Прычым у міліцыю ўладальнік золата не звяртаўся. Ён хадзіў з апёкамі па вёсцы, дзе яго траўмы праз некалькі дзён убачылі мясцовыя і выклікалі хуткую. Медыкам ён расказаў, як атрымаў сляды на целе, а тыя ўжо паведамілі міліцыянтам. Налётчыкаў затрымалі, эксперты канфіскавалі манету, прас і палку.
Абодва затрыманыя афіцыйна працавалі, адзін з іх быў судзімы за нанясенне цяжкіх траўмаў. Цяпер у дачыненні да іх завялі крымінальную справу па ч. 2 арт. 207 КК (Разбой, учынены групай асоб), фігуранты пад вартай. Ім пагражае да 15 гадоў пазбаўлення волі.