У горадзе Буча Кіеўскай вобласці невядомы мужчына ўзарваў сябе ў аўто гранатай. Выбух адбыўся пасля таго, як ён пачаў пагражаць кіроўцу за адмову везці яго на мяжу з Беларуссю. Пра гэта паведамляе паліцыя Кіеўскай вобласці.
Як расказалі ў паліцыі, каля 10.50 ім паступіла паведамленне ад жыхаркі горада пра тое, што ля яе дома адбыўся выбух у аўтамабілі.
«Як папярэдне высветлілі праваахоўнікі, да 59-гадовага кіроўцы аўтамабіля Kia ў машыну сеў невядомы мужчына і, пагражаючы гранатай, запатрабаваў адвезці яго на мяжу з суседняй дзяржавай. Кіроўца паспеў пакінуць аўто, невядомы ўзарваў боепрыпас. Чалавек загінуў на месцы. Кіроўца цялесных пашкоджанняў не атрымаў», — паведамілі падрабязнасці праваахоўнікі.
Цяпер на месцы здарэння працуе следча-аператыўная група, высвятляюцца ўсе абставіны здарэння.
На відэа, апублікаваным у тэлеграм-канале «Це Ірпінь, Гріша», кіроўца Kia расказвае, што невядомы спачатку папрасіў падкінуць яго да Гастомеля, а потым запатрабаваў везці на беларускую мяжу.
«Я яму кажу: „Я цябе не павязу“. Ён дастае з кішэні гранату і кажа: „Мне страчваць няма чаго“», — расказаў кіроўца.