Жыхар Брэста пазнаёміўся з дзяўчынай у сацсетках, падчас перапіскі яна прапанавала абмяняцца інтымнымі фота, калі хлопец даслаў ёй свае здымкі, яна пачала пагражаць, што разашле фатаграфіі яго знаёмым, калі ён не заплаціць. Пра гэта паведамляе тэлеграм-канал УУС Брэсцкага аблвыканкама.
Пацярпелы — 21-гадовы хлопец. З яго словаў, з новай знаёмай ён меў зносіны ўсяго дзень, але завязалася «гарачая» прыватная перапіска. Дзяўчына прапанавала даслаць адно аднаму інтымныя фота, яны абмяняліся здымкамі, але потым віртуальная сяброўка рэзка змяніла тон і пачала пагражаць, што разашле пікантныя фота ўсім яго знаёмым, а каб гэтага не адбылося, запатрабавала пералічыць ёй 1200 рублёў.
Брастаўчанін не стаў плаціць, а замест гэтага адразу звярнуўся ў міліцыю. Следчыя распачалі крымінальную справу за вымагальніцтва.
Тым часам у міліцыі нагадалі: каб не трапіць у такую сітуацыю, трэба памятаць некалькі правілаў:
- не абменьвайцеся інтымнымі фота ці відэа ў сацсетках і мэсэнджарах;
- не захоўвайце такія файлы ў электронных ці воблачных сховішчах і ў сацсетках, куды лёгка можа атрымаць доступ махляр;
- не перадавайце фота і відэа асабістага характару праз электронную пошту;
- не паддавайцеся на правакацыі зрабіць такія фота ці відэа пасля знаёмства ў інтэрнэце;
- не ўдзельнічайце ў адкрытых відэачатах з незнаёмцамі.