У Беларусі ўвялі змены па выплаце пратэрмінаванай запазычанасці па заробках. Так, чыноўнікі прынялі спецыяльны ўказ, які дазваляе Мінпрацы патрабаваць ад працадаўцаў аператыўна пагашаць запазычанасць перад супрацоўнікамі. І для гэтага не трэба будзе чакаць вынікаў спецыяльнай праверкі.
Як тлумачаць у Мінпрацы, дэпартаменту дзяржінспекцыі працы пры гэтым ведамстве дазволілі выдаваць наймальнікам патрабаванні аб пагашэнні запазычанасці па зарплаце без прызначэння спецыяльнай праверкі. Прасцей кажучы, калі ў Мінпрацы будзе інфармацыя наконт пратэрмінаваных заробкаў, да прыкладу, са скаргаў работнікаў, то ведамства можа патрабаваць ад наймальніка аператыўна пагасіць запазычанасць. Пры гэтым праверку, якая выявіць нявыплату, праводзіць не трэба будзе.
«Цяпер у выпадку, калі цалкам відавочна і даказана, што заробак не плацяць, спачатку праверка мусіць быць, якая, само сабой, працэс зацягвае. А людзі без заробку. Прапануецца ўсё паскорыць, дадатковыя праверкі без неабходнасці не праводзіць», — тлумачылі раней у Мінпрацы.
У ведамстве ўдакладняюць, што выпадкі нявыплаты заробкаў могуць «выяўляць на падставе інфармацыі, размешчанай у СМІ, якая ўтрымліваецца ў пісьмовых зваротах грамадзян і паступіла ад органаў дзяржкіравання».
Калі наймальнік выплаціць заробак у патрэбны тэрмін, то пазбегне «адміністрацыйкі». «Пры невыкананні патрабавання дэпартамент выносіць рашэнне аб спагнанні заработнай платы, якое накіроўваецца ў органы прымусовага выканання.
Як паведамляе Мінпрацы, работнікам, якім затрымліваюць заробкі, не давядзецца самастойна звяртацца з пазовам пра нявыплату ў суд або натарыят, а затым — у органы прымусовага выканання. Хто канкрэтна будзе гэта рабіць за работніка, у ведамстве не ўдакладняюць.