Беларускія партызаны скінулі выбуховыя прылады на расійскі ДРЛВ А-50 на вайсковым аэрадроме ў Мачулішчах, самалёт моцна пацярпеў. Пра гэта «Люстэрку» расказаў кіраўнік BYPOL Аляксандр Азараў. Выбухі на вайсковым аэрадроме жыхары ваколіцаў чулі раніцай.
Азараў заявіў, што на аэрадроме ў Мачулішчах беларускія партызаны, удзельнікі плана «Перамога», раніцай 26 лютага правялі дыверсію. Ён пацвердзіў версію пра атаку дрона, якую высоўвалі расійскія праўладныя блогеры. Паводле прадстаўніка BYPOL, партызаны скінулі з дрона дзве выбуховыя прылады на самалёт А-50 (савецкі і расійскі самалёт далёкага радыёлакацыйнага выяўлення і кіравання), які стаяў на ўзлётна-пасадачнай паласе.
Таксама ён дадаў, што самалёт моцна пацярпеў «і лётаць ужо не зможа». Як адзначалася ў допісе ініцыятывы, пацярпелі пярэдняя і цэнтральная часткі самалёта, пашкоджаная авіёніка і радыёлакацыйная антэна.
— Гэты самалёт у Беларусі адзін. Калі ён узлятаў падчас апошніх лётных вучэнняў, ва Украіне абвяшчалі паветраную трывогу, бо ён карэктуе ракетныя ўдары для бамбардзіроўшчыкаў. Ён карэктуе дзеянне ўсёй варожай авіяцыі. Гэта вельмі важны і дарагі самалёт, — патлумачыў Азараў і расказаў пра мэты дыверсіі. — Расія — наш агульны вораг, з якім мы змагаемся разам з украінцамі. І мы змагаемся за незалежную Беларусь.
Ён таксама дадаў, што інфармацыі пра пацярпелых расійскіх або беларускіх вайскоўцаў падчас дыверсіі няма. А партызаны, якія маюць дачыненне да яе, ужо знаходзяцца ў бяспечным месцы. Як ён пацвердзіў «Белсату», гэтыя людзі ўжо выехалі за мяжу.
Нагадаем, раніцай у ваколіцах вайсковага аэрадрома ў Мачулішчах чулі два выбухі. У BYPOL паведамілі, быў пашкоджаны расійскі ваенна-транспартны самалёт і снегаўборачная тэхніка. У мясцовых чатах пісалі пра канцэнтрацыю вайскоўцаў «з аўтаматчыкамі», праверкі машын, што праязджалі міма, абыходы супрацоўнікамі АМАП мясцовых жыхароў. У Мінабароны сітуацыю афіцыйна не каментавалі. На пытанні журналісткі «Люстэрка», якая патэлефанавала як занепакоеная мясцовая жыхарка, запэўнілі, што «шэта хлапкі і нічога страшнага не адбылося». У МНС сказалі, што інфармацыі пра выбухі не паступала.
У першыя дні вайны Генеральны штаб УСУ паведамляў, што кіраванне і пасадка расійскай авіяцыі ажыццяўлялася самалётамі А-50 з тэрыторыі Мінскай вобласці і Крыма. У сакавіку 2022 года, як мяркуецца, гэты ваенны самалёт заўважалі над Гомелем і Баранавічамі.