Аляксандр Лукашэнка на сустрэчы з сакратарамі саветаў бяспекі дзяржаваў — чальцоў Арганізацыі Дамовы аб калектыўнай бяспецы пракаментаваў контрнаступленне Украіны, піша яго прэс-служба.
За апошні час была знішчаная вялікая колькасць украінскай тэхнікі і ўкраінскіх салдат.
«Тры дні „контрнаступа“. Тое, што бачым мы, і інфармацыя, якую я атрымаў ад прэзідэнта Расіі, цалкам супадаюць. За тры дні каля трох дзясяткаў танкаў знішчана — украінскіх, якія наступаюць. Абараняцца прасцей, чым наступаць — вы разумееце. 120 або 130 БМП за тры дні. І самае страшнае — больш за 2100 загінула ўкраінцаў. 2100! З гэтага боку крыху больш за 70. Вось вам вынік гэтай спробы „контрнаступа“», — заявіў Лукашэнка.
На яго думку, контрнаступленне было вялікай дэзінфармацыяй з боку Украіны.
«Ніякага „контрнаступа“ няма і быць не можа. А калі — вось вынік за тры дні. І самае галоўнае — чацвёрты-пяты дзень цішыня. Пра што гэта кажа? Пацярпелі сур’ёзную паразу, селі і думаюць [Захад], а што рабіць далей», — сказаў ён.
Лукашэнка таксама заклікаў удзельнікаў сустрэчы не шукаць прычынаў вайны ва Украіне.
«Як чалавек ужо дасведчаны хацеў бы проста папрасіць вас і перасцерагчы ад спробы пашукаць цяпер нейкія прычыны. Рана ці позна мы будзем казаць пра прычыны. Але цяпер найважнейшае пытанне — спыніць гэты канфлікт», — сказаў Лукашэнка.
Раней Лукашэнка заявіў, што «ніякага „контрнаступа“, з майго пункту гледжання, няма і быць не можа».
«Але, мушу сказаць, самая вялікая дэзінфармацыя — гэты „контрнаступ“. Ніякага „контрнаступа“, з майго пункту гледжання, няма і быць не можа. Гэта проста вар’яцтва. Адзін да пяці на фронце ваяваць па тэхніцы і жывой сіле — гэта проста вар’яцтва! Не, трэба нагнятаць, трэба накручваць украінцаў для таго, каб працягваць і патапіць нас у гэтым супрацьстаянні. У гэтым сёння сутнасць на фронце. Мы гэта бачым. Гэта ў нас за плотам проста», — заявіў ён 18 траўня гэтага года.
Нагадаем, напярэдадні сакратар РНБА Украіны Аляксей Данілаў паведаміў, што контрнаступленне яшчэ не пачалося. У гэты ж дзень намесніца міністра абароны Украіны Ганна Маляр заявіла, што на Бахмуцкім напрамку УСУ перайшлі ад абароны ў наступ.