Мабільныя аператары падрыхтавалі чарговую порцыю змяненняў для сваіх кліентаў. Яны датычаць некаторых тарыфных планаў, а таксама продажу роўтараў.
Кампанія А1 уводзіць змяненне для кліентаў — фізічных асоб па тарыфе «МЕГА Прайм», які прадугледжвае сямейную падпіску (можна дзяліцца дадатковым інтэрнэт-трафікам паміж трыма абаненцкімі нумарамі, а таксама прадугледжаныя безлімітныя званкі паміж удзельнікамі). Так, з 19 снежня падключыцца да сямейнай падпіскі не змогуць абаненты тарыфнага плана «Перадача дадзеных».
Яшчэ адно новаўвядзенне ад А1 датычыць роўтараў. У ліпені гэтага года кампанія запусціла продаж гэтага абсталявання ў растэрміноўку на 36 месяцаў. А з 3 студзеня 2024 года А1 перастане даваць роўтары для бясплатнага карыстання кліентам — фізічным асобам. Тым, хто не верне да гэтай даты выдадзеныя раней роўтары для бязвыплатнага карыстання, будзе даступная паслуга «арганізацыя пункту падлучэння Wi-Fi прылады». Яна прадугледжвае абанплату ў 90 капеек за 30 дзён. «Разам з тым за кліентам захоўваецца магчымасць вяртання выдадзенага раней абсталявання і набыцця актуальных мадэляў у растэрміноўку», — удакладняе аператар.
З 19 снежня А1 таксама ўвядзе некаторыя змены для юрыдычных асоб, індывідуальных прадпрымальнікаў, рамеснікаў і самазанятых. Гэта датычыць паслуг «Віртуальная АТС» і «Каардынатар 2.0».
Мабільны аператар life:) запусціў акцыю па тарыфе «Бясконцы». Кліенты з Брэсцкай, Віцебскай, Гомельскай, Мінскай і Магілёўскай абласцей да 31 траўня 2024 года могуць падключыць гэтую паслугу за 0 рублёў у першы месяц, наступныя 5 месяцаў карыстання абыдуцца ў 10,9 рубля. Потым будзе абанплата ў 15,9 рубля ў месяц. Але ў гэтай акцыі ёсць умова. «Узяць удзел у акцыі можна адзін раз, калі вы раней не карысталіся нашай сувяззю ці ў вас больш за 90 дзён няма актыўных нумароў у сетцы life:)», — удакладняе мабільны аператар. Мінчукі гэтай акцыяй скарыстацца не змогуць.
У МТС да канца гэтага года дзейнічае акцыя па бясплатнай дастаўцы тавараў з інтэрнэт-крамы гэтага мабільнага аператара. Таксама кампанія прапануе пры куплі смартфона Redmi Note 12 Pro атрымаць дадаткова бонус — фітнес-бранзалет Mi Smart Band 7 за 10 капеек.
Чытайце таксама
