Мінюст падрыхтаваў чарговыя новаўвядзенні што да рыэлтарскіх паслуг. Міністэрства размясціла для грамадскага абмеркавання адпаведны законапраект.
Так, Мінюст выступае за тое, каб стварыць Палату рыэлтараў, якой хочуць перадаць некаторыя функцыі дзяржавы па кантролі над рынкам гэтых паслуг.
Таксама прапануецца скараціць да двух чалавек мінімальную колькасць рыэлтараў у штаце для адпаведных арганізацый. Цяпер патрабуецца ад двух да пяці ў залежнасці ад штатнай колькасці кампаніі.
Мінюст таксама выступае за тое, каб увесці паслабленні па атэстацыі рыэлтараў. Для іх збіраюцца адмяніць патрабаванне пра наяўнасць профільнай адукацыі.
Рыэлтарам хочуць забараніць браць плату за перадачу інфармацыі пра прапановы на аб’екты нерухомасці «з мэтай заключэння дамовы арэнды жылых памяшканняў». Мінюст лічыць, што аплата такіх паслуг мусіць адбывацца толькі пасля падбору аб’екта для арэнды і падпісання акта аказаных паслуг.
Рыэлтарскія арганізацыі таксама збіраюцца абавязаць мець як касавае абсталяванне, так і аплатны тэрмінал.
Як паведамляецца, законапраект падрыхтавалі «для комплекснага рэгулявання рыэлтарскай сферы, яе далейшага развіцця, вырашэння праблем». Таксама чыноўнікі хочуць увесці дадатковыя механізмы, каб палепшыць якасць рыэлтарскіх паслуг.
Пакінуць каментар наконт гэтага законапраекта можна да 26 ліпеня. Зрабіць гэта можна на нацыянальным прававым форуме.
Чытайце таксама
