Літва пайшла на саступкі і скарэктавала правілы ўезду легкавых аўто з беларускімі рэгістрацыйнымі знакамі ў краіну, паведамілі ў Мытнай службе Літвы.
Пасля забароны на ўезд у Літву легкавых аўто з беларускімі нумарамі амаль месяц дзейнічала выключэнне для тых, у каго ёсць літоўская віза ці ВНЖ. Аднак 15 жніўня быў апошнім днём, калі такія людзі маглі трапіць у гэтую краіну.
Напярэдадні Міжнародная камісія па каардынацыі санкцый унесла змены ў пастанову. З 17 жніўня, згодна з дакументам, у Літву ўсё гэтак жа можна ехаць на легкавым аўтамабілі, які не прызначаны для продажу і належыць грамадзяніну Беларусі, што мае сапраўдную візу, выдадзеную Літоўскай Рэспублікай, або дзейны часовы ці пастаянны від на жыхарства ў Літве. Пры гэтым за рулём транспартнага сродку мусіць знаходзіцца ўладальнік. На аўтамабілі, якія належаць юрыдычным асобам ці выкарыстоўваюцца ў камерцыйных мэтах, гэта рашэнне не распаўсюджваецца.
У ведамстве нагадалі, што пасля 18 студзеня 2025 года зарэгістраваныя ў Беларусі аўтамабілі не змогуць знаходзіцца на тэрыторыі Літвы. Асобы, якія кіруюць аўто з беларускімі нумарамі пасля гэтага тэрміну, будуць лічыцца парушальнікамі. Іх прыцягнуць да адміністрацыйнай адказнасці, якая прадугледжвае штраф і канфіскацыю транспартнага сродку.
Да 18 студзеня 2025 года аўтамабілі з беларускімі нумарамі могуць удзельнічаць у дарожным руху на тэрыторыі Літвы, а таксама ўвозіцца і рэгістравацца ў краіне.