У Мінску 19 і 20 лістапада збіраюцца правесці міні-кірмашы вакансій для тых, хто лічыцца незанятым у эканоміцы. Нагадаем, 16 лістапада Аляксандр Лукашэнка заявіў, што ў Беларусі не мусіць быць «бамжоў і дармаедаў». Раней чыноўнікі адзначалі, што могуць увесці чарговыя абмежаванні для тых, хто трапіў у базу «утрыманцаў».
Міні-кірмашы вакансій пройдуць у Мінску 19 і 20 лістапада па адрасе: вул. Берасцянская, д. 20, — у цэнтры занятасці. Пра гэта паведамляе камітэт па працы, занятасці і сацыяльнай абароне насельніцтва Мінгарвыканкама.
На іх запрашаюць тых, хто не заняты ў эканоміцы, а таксама «вядзе асацыяльны лад жыцця» (сацслужбы да іх адносяць, да прыкладу, тых, хто нядаўна выйшаў з лекава-працоўнага прафілакторыя ці стаіць на ўліку ў міліцыі).
«Шукальнікі працы атрымаюць магчымасць даведацца інфармацыю пра вакансіі, прапанаваныя наймальнікамі, умовы працы, атрымаць кансультацыі спецыялістаў дзяржаўнай службы занятасці і прадстаўнікоў кадравых службаў арганізацый, прайсці папярэдняе сумоўе па пытаннях працаўладкавання», — удакладняюць у камітэце па працы, занятасці і сацабароне насельніцтва Мінгарвыканкама.
Сярод анансаваных наймальнікаў — страхавая кампанія «Прыёрлайф», «Мінсктранс», ЖЭУ некаторых раёнаў сталіцы, «Рэмаўтадар» Маскоўскага раёна.
Як паведамляюць сацслужбы, шукальнікам прапануюць больш за 200 вакансій. Сярод іх — грузчык, прыбіральшчык памяшканняў, страхавы агент, маляр, слесар-сантэхнік, трактарыст, дарожны рабочы, мыйшчык посуду, буфетчык, кухар, электрагазазваршчык.
Тых, хто шукае працу, просяць прынесці з сабой працоўную кніжку, а таксама дакументы пра адукацыю і пасведачанне асобы.
Як чыноўнікі хочуць змагацца з «дармаедамі»
«Трэба, каб у чалавека разам з заробкам расла матывацыя і кваліфікацыя. Але давайце будзем адкрыта казаць. У нас усе хочуць працаваць як найлепшыя? Вось сёння яны будуць на сцэне. Далёка не ўсе… Рыхтуйцеся. Рыхтуйцеся! — заявіў Аляксандр Лукашэнка 16 лістапада гэтага года. — Бамжоў, дармаедаў у краіне не будзе. Усе павінныя варушыцца, працаваць, зарабляць на сябе і на сваю сям’ю. Мы дапаможам. Мы дапаможам, дамо працоўнае месца, толькі ідзіце працаваць. Тыя, хто перашкаджае людзям жыць, мы, хлопцы і дзяўчаты, з вамі будзем сур’ёзна разбірацца. Не крыўдуйце».
Падрабязнасці таго, што канкрэтна могуць зрабіць чыноўнікі для барацьбы з «дармаедствам», не паведамляліся.
Нагадаем, чыноўнікі працягваюць абмяркоўваць варыянт, каб увесці дадатковыя абмежаванні па «дармаедстве», гэтым разам — для тых, хто працуе за мяжой. Сярод іншага — зрэзаць для іх бясплатную медыцыну. Тым часам нядаўна Наталля Качанава абурылася, што некаторыя беларусы працуюць за мяжой, а ў нашай краіне лічацца беспрацоўнымі і «сядзяць на сацыяльным забяспечанні». Дасталася і сем’ям такіх людзей: маўляў, таксама «карыстаюцца ўсімі сацыяльнымі выгадамі ў Беларусі». Асабліва чыноўнікі акцэнтуюць увагу на дальнабойшчыках.
Тыя, хто трапляе ў «дармаедскую» базу, поўнымі тарыфамі аплачваюць ацяпленне, гарачую ваду і газ.
Чытайце таксама
