У студзені гэтага года, у месяц, калі прызначаныя выбары, Аляксандр Лукашэнка збіраецца наведаць Кітай. Пра гэта ён заявіў падчас сустрэчы са сваімі даверанымі асобамі 3 студзеня. Чаму ён сабраўся ў Пекін і якія пытанні будзе абмяркоўваць з кіраўніком КНР Сі Цзіньпінам? Пра гэта «Люстэрка» спытала палітычнага аналітыка Валерыя Карбалевіча.
— Ёсць запрашэнне кітайскага кіраўніцтва пабываць у Кітаі. Трэба сустрэцца з кіраўніцтвам Кітая, каб вызначыць нашую далейшую палітыку на перспектыву. Гэта адзін з нашых стратэгічных партнёраў, — заявіў Лукашэнка пра свае планы на студзень. Даты візіту ён не ўдакладніў, але з вялікай доляй імавернасці паездка адбудзецца да дня галасавання, прызначанага на 26 студзеня.
Палітычны аналітык Валерый Карбалевіч найперш звяртае ўвагу на тое, што час для візіту выбіраў не Лукашэнка, а кітайскае кіраўніцтва.
— Ён едзе ў Кітай тады, калі там гатовыя яго прыняць, — падкрэслівае Карбалевіч. — У Сі Цзіньпіна вельмі напружаны графік, менавіта ён выбірае, калі ў яго з’явіцца нейкае акенца для сустрэчы. І таму Сі вырашае, калі Лукашэнка да яго прыедзе, а не наадварот.
Тым не менш напярэдадні прэзідэнцкіх выбараў Лукашэнка абавязкова выкарыстае візіт у Кітай для прапагандысцкіх мэтаў, упэўнены Валерый Карбалевіч.
— Тут важны, па-першае, сам факт, што яго гатовы прыняць кіраўнік другой дзяржавы ў свеце, а таксама тое, што Сі Цзіньпін яго прызнае, — лічыць палітычны аналітык. — Нават проста з’явіцца на тэлевізійнай карцінцы разам з кіраўніком Кітая, паціснуць яму руку. Для Лукашэнкі важнае менавіта гэта, незалежна ад таго, якія пытанні яны будуць абмяркоўваць. З гэтага беларускія ўлады, вядома, зробяць вялікі піяр.
Нагадаем, у чэрвені 2024 года прэзідэнт Польшчы Анджэй Дуда папярэдзіў кіраўніка КНР пра магчымасць закрыцця таварных перавозак з Беларуссю ў выпадку эскалацыі міграцыйнага крызісу на мяжы. Пасля гэтага тагачасны міністр замежных справаў Сяргей Алейнік заявіў пра гатоўнасць да дыялогу з Польшчай. На думку Карбалевіча, сярод тэмаў, якія Лукашэнка абавязкова абмяркуе з Сі Цзіньпінам, будзе ў першую чаргу пытанне транзіту кітайскіх тавараў у Еўрапейскі саюз праз тэрыторыю Беларусі.
— Транзіт кітайскіх тавараў праз Беларусь — гэта вельмі важнае пытанне, — адзначае аналітык. — Статус транзітнай дзяржавы ў значнай меры быў страчаны Беларуссю ў сувязі з той сітуацыяй, якая ёсць у рэгіёне.
Другой тэмай перамоваў Лукашэнкі і Сі Цзіньпіна можа стаць пытанне кітайскіх інвестыцый у Беларусь. Валерый Карбалевіч упэўнены, што апошнім часам эканамічная цікавасць Кітая да нашай краіны моцна знізілася.
— Гэтаму спрыяюць вайна Расіі з Украінай, увядзенне эканамічных санкцый супраць Беларусі і непрызнанне Лукашэнкі прэзідэнтам краінамі Захаду, — кажа эксперт. — Гэта вельмі балючае пытанне, бо Беларусь разлічвала на кітайскія інвестыцыі, на эфектыўнае функцыянаванне кітайска-беларускага індустрыяльнага парку «Вялікі камень». Але ва ўмовах санкцый знізілася цікавасць кампаній з КНР інвеставаць у Беларусь. Палітычныя адносіны Лукашэнкі з Кітаем добрыя, але эканамічныя перажываюць пэўны крызіс. Не ведаю, ці магчыма наогул гэта выправіць да таго, як Беларусь нармалізуе адносіны з Еўропай.
Нагадаем, апошні раз Аляксандр Лукашэнка наведваў Кітай у пачатку снежня 2023-га. Да гэтага аналагічны візіт адбыўся ў сакавіку таго ж года.
Чытайце таксама
