У «Белтэхаглядзе» расказалі, колькі транспарту ў 2024-м у Беларусі атрымала допуск да ўдзелу ў дарожным руху. У цэлым за год іх стала менш у параўнанні з 2023-м, але канкрэтна ў мінулым месяцы аўтаўладальнікі актыўнічалі. Таксама ў «Белтэхаглядзе» расказалі, колькі чалавек скарысталася новай электроннай паслугай.
У снежні мінулага года выдалі 108 834 дазволы на допуск транспарту да ўдзелу ў дарожным руху. Гэта на 18,8% больш у параўнанні са снежнем 2023-га (тады было 91 648 дазволаў). Пры гэтым канкрэтна фізічным асобам у мінулым месяцы выдалі 85 341 дазвол. Гэта 78,4% ад агульнай колькасці.
У цэлым за 2024 год выдалі 1 510 315 дазволаў да ўдзелу ў дарожным руху (у тым ліку фізічным асобам — 1 241 726). Гэта на 1,1% менш, чым у 2023-м.
Якая сітуацыя з электратранспартам?
Што да электрамабіляў, то канкрэтна ў снежні адзнаку пра праходжанне тэхагляду атрымалі 1256 адзінак такога транспарту (а агулам за ўвесь мінулы год — 14 416).
Колькі разоў скарысталіся новай паслугай?
У «Белтэхаглядзе» таксама расказалі, што 297 дазволаў да ўдзелу ў дарожным руху выдалі ў электроннай форме — без наведвання дыягнастычнай станцыі. Нагадаем, з лістапада мінулага года ў Беларусі некаторыя фізасобы і юрыдычныя асобы могуць у анлайн-рэжыме атрымаць адзнаку пра пройдзены тэхагляд.
Гэтым новаўвядзеннем дазволілі скарыстацца ўладальнікам транспарту, які быў выраблены менш за два гады таму. Такім аўтамабілістам не трэба праходзіць тэхагляд, дастаткова толькі паставіць дазвол на допуск транспартнага сродку да ўдзелу ў дарожным руху. Калі раней для гэтага ўсё роўна патрабавалася ехаць на дыягнастычную станцыю, то цяпер гэта можна зрабіць анлайн. Выключэнне — колавыя трактары, прычэпы, паўпрычэпы да іх.
Чытайце таксама
