У сакавіку сілавікі амаль кожны дзень ладзілі аблавы па ўсёй краіне: паводле звестак праваабаронцаў, толькі за месяц затрымалі не менш за 614 чалавек. Цэнтр «Вясна» сабраў спіс самых абсурдных прычын, з якіх беларусы траплялі пад рэпрэсіі.
У сакавіку сілавікі практычна штодня праводзілі масавыя затрыманні і ператрусы ў розных рэгіёнах краіны — у Пінску, Мёрах, Барысаве, Глыбокім, Мазыры, Лепелі, Полацку і іншых гарадах. Пасля рэйдаў на затрыманых складалі пратаколы за «экстрэмісцкія рэпосты», «несанкцыянаванае пікетаванне» і «непадпарадкаванне міліцыі».
Паводле звестак «Вясны», у сакавіку затрымалі не менш за 614 чалавек, прычым большасць — у другой палове месяца. Суддзі вынеслі не менш за 433 рашэнні па адміністрацыйных справах, адправіўшы пад арышт мінімум 166 чалавек і прызначыўшы некалькі дзясяткаў штрафаў.
Глыбокае: «няправільная» ёлка і пікет у фэйсбуку
Вялікая аблава ў Глыбокім прайшла 16 сакавіка. Усяго за месяц там затрымалі 22 чалавекі, з якіх дзевяцярых адправілі за краты, а шасцярых аштрафавалі.
Так, Сяргея Катовіча арыштавалі на 10 сутак за фота, апублікаваныя ў «Аднакласніках»: на здымках былі бел-чырвона-белы бот з прусаком на падэшве і навагодняя ёлка, упрыгожаная шарамі, БЧБ-сцягам, гербам «Пагоня» і надпісам «Жыве Беларусь».
А мясцовага прадпрымальніка Юрыя Татарыновіча аштрафавалі на 2590 рублёў за тое, што ён без дазволу райвыканкама «правёў адзіночнае пікетаванне з мэтай публічнага выказвання сваіх грамадска-палітычных поглядаў». А зрабіў ён вось што: выклаў у фэйсбуку сваё фота са сцягам Украіны і гербам «Пагоня». Таксама ў яго на старонцы знайшлі пост з выявай БЧБ-сцяга.
Івацэвічы: позва і яшчэ тры аркушы
У Івацэвічах 13 сакавіка каля ваенкамата затрымалі чатырох мясцовых жыхароў.
Як вынікае з іх паказанняў, маладыя людзі суправаджалі Данііла ў ваенкамат, куды яго выклікалі позвай: неўзабаве хлопца мусілі адправіць у войска. Калі ён выйшаў адтуль, сябры прапанавалі сфатаграфавацца разам на фоне будынка, трымаючы ў руках тры аркушы фармату А3. На іх было напісана «Свабоду Даніку» і намаляваная пяціканцовая зорка. Яны папрасілі мінака зрабіць групавы здымак, але тут з’явіўся супрацоўнік ваенкамата і забраў плакаты.
Выклікалі нарад міліцыі, сяброў затрымалі. Іх дзеянні расцанілі як «несанкцыянаванае пікетаванне». У выніку хлопцаў арыштавалі на сем сутак, а дзяўчыну аштрафавалі на 185 рублёў.
Наваполацк: арышты за сацсеткі
У Наваполацку ў сакавіку вынеслі не менш за дзесяць «палітычных «прысудаў. Прычым адна суддзя — Зінаіда Балаболава: большасць затрыманых яна адправіла пад арышт.
Ігара Прушынскага яна прызнала вінаватым у «пікетаванні» відэакліпам з БЧБ-сімволікай «Вконтакте», які быў апублікаваны ў 2019 годзе. Вынік — арышт на 10 сутак.
А Галіну Шчаднёву пасадзілі на 10 сутак за падпіску на старонку Паўла Латушкі ў Instagram.
Горкі: званок у міліцыю з пратэстам
15 сакавіка ў судзе Горацкага раёна судзілі мясцовага жыхара, якога абвінавачвалі адразу па двух адміністрацыйных артыкулах: абразу службовай асобы і несанкцыянаваны пікет.
Мужчына, нібыта п’яны, патэлефанаваў у мясцовае аддзяленне міліцыі і правёў пікет, «выказаўшы асабісты пратэст супраць Лукашэнкі», а таксама абразіў горацкага ўчастковага. Яго асудзілі на трое сутак арышту, а таксама прызначыла штраф — 740 рублёў.
