Суд у Санкт-Пецярбургу асудзіў беларуса Аляксандра Мацулевіча на чатыры гады калоніі. Яго абвінавацілі ў даванні хабару начальніку памежнай службы ФСБ Расіі і замаху на арганізацыю незаконнага перасячэння мяжы, паведамляе аб’яднаная прэс-служба судоў горада. Гэтую інфармацыю заўважыла «Медыязона».
Разам з Мацулевічам у замаху на арганізацыю незаконнага перасячэння мяжы абвінавацілі яшчэ аднаго перавозчыка, Гулама Джэлані. 12 афганцаў, сярод якіх — журналістка Кобра Хасані, абвінавацілі ў замаху на незаконнае перасячэнне мяжы Расіі паводле папярэдняй змовы і асудзілі на два гады ў калоніі-пасяленні, пасля чаго вызвалілі ў зале суда, бо яны ўжо адбылі прызначанае пакаранне, пакуль знаходзіліся пад вартай у СІЗА.
Кіруючыся матэрыяламі справы, абвешчанымі ў судзе, абвінавачанне палічыла, што Мацулевіч дамовіўся з супрацоўнікам памежнай службы ФСБ РФ Уладзімірам Логуцевым пра перамяшчэнне морам групы афганцаў у Еўропу з Новага порта Санкт-Пецярбурга. Бежанцаў сабраў Гулам Джэлані. Паслугі па перавозцы каштавалі 1500 даляраў.
У красавіку 2022 года беларус стэлефанаваўся з супрацоўнікам памежнай службы ФСБ РФ і прапанаваў яму ўгоду па перавозцы ўцекачоў. Той пагадзіўся, запісаў размову, а пасля склаў рапарт свайму кіраўніцтву. Пазней яму прапанавалі паўдзельнічаць у аператыўна-вышуковым мерапрыемстве.
Усіх абвінавачаных затрымалі ўвечары 23 траўня 2022 года. Пасля перадачы Мацулевічам 6000 даляраў і 12 пашпартоў Логуцеву беларуса затрымалі супрацоўнікі САХР. Адначасова ў маршрутцы затрымалі 12 грамадзян Афганістана, сярод якіх была журналістка Кобра Хасані.
Хасані ўцякла з Афганістана ў Кіеў пасля захопу ўлады талібамі. Увесну 2022 года яна села ў мікрааўтобус, які мусіў вывезці яе з Украіны ў Польшчу, але замест гэтага апынулася ў Расіі.