Гарадскі пасёлак Карма на Гомельшчыне ўжо ў пачатку сакавіка сталі рыхтаваць да правядзення абласных «Дажынак». Як паведамляе тэлеграм-канал «Гомельщина официально», пачалі з абнаўлення фасадаў і ўсталявання новых бардзюраў. Характэрна, што ў гэты ж час у гэтым раёне, адным з самых бедных у краіне, рэзка выраслі заробкі.
Традыцыйна работы ідуць на галоўных вуліцах, якія будуць защважныя ўдзельнікам свята. «У доме № 33 на вуліцы Ільюшчанкі абнаўляюць фасад, на вуліцы Леніна дэмантуюць старыя і ставяць новыя бардзюры. На чарзе і іншыя аб’екты», — гаворыцца ў паведамленні тэлеграм-канала.
Пра тое, што «Дажынкі-2024» у Гомельскай вобласці пройдуць у гарадскім пасёлку Карма, стала вядома ў лістападзе мінулага года на аграрным свяце ў пасёлку Акцябрскі. Тады старшыня Кастрычніцкага райвыканкама Ірына Намачэнка перадала кіраўніку Кармянскага раёна Дзмітрыю Шынкарэнку сімвалічны сноп.
Падрыхтоўка да «Дажынак» падтрымлівае эканоміку раёна
У студзені 2024 года рэзка вырас сярэдні заробак у гэтым раёне — да 1311,2 рубля. Год таму ён быў крыху большы за тысячу рублёў. У рэальным выражэнні сярэдні заробак там вырас на 16,5%, у той час як год таму рост быў усяго 7,6%.
У Кармянскім раёне традыцыйна самыя нізкія заробкі ў краіне. Напрыклад, нават пасля прыкметнага росту ў студзені гэтага года яны складаюць усяго 71,7% ад сярэдняй зарплаты па вобласці.
Можна меркаваць, што на росце заробкаў у раёне адбіліся акурат распачатыя работы па падрыхтоўцы да «Дажынак».
Гэта відаць таксама ў статыстыцы па працы прадпрыемстваў. У першую чаргу па інвестыцыях у будаўніцтве — у студзені гэтага года да таго ж месяца мінулага яны выраслі больш чым у чатыры разы. А па выніках 2022 года прырост быў усяго на 20%.
Інвестыцыі ў машыны і абсталяванне выраслі больш чым у сем разоў у гадавым выражэнні. Пра тое, што гэтаму спрыялі работы па падрыхтоўцы да абласнога свята, сведчыць і тое, што ў іншых галінах рост нашмат больш сціплы. Напрыклад, сельская гаспадарка ўпала на 2,6%. Унутраны гандаль вырас на 8,2%.
Чытайце таксама
