Беларускія «Кіберпартызаны» заявілі, што «Гродна Азот» зноў атакаваны, і нагадалі пра свае патрабаванні вызваліць палітвязняў.
«Падчас першай атакі на сетку „Гродна Азота“ былі закладзеныя вірусы, якія спрацоўваюць па раскладзе. Учора адпрацавала першая серыя такіх „закладак“, якая мусіла выдаліць дадзеныя многіх сотняў ПК супрацоўнікаў, дакументаабарот, дамен-кантролеры і іншыя серверы. Паводле нашай інфармацыі, на прадпрыемстве паніка. Дыспетчар аддаў загад тэрмінова выключыць камп’ютары па ўсім прадпрыемстве. Пазнавата», — напісалі «Кіберпартызаны» ў сваім тэлеграм-канале.
У групоўцы нагадалі, што нейтралізуюць і выдаляць усе «закладкі», калі будуць выкананыя іх патрабаванні што да вызвалення палітвязняў.
«Нашая мэта — зрабіць так, каб гэтыя палітзэкі сталі самымі дарагімі ў свеце для мінскай хунты», — заявілі хакеры.
«Кіберпартызаны» са спасылкай на крыніцу ў Security Lab таксама расказалі, што пасля першага ўзлому на «Гродна Азот» паслалі цэлую брыгаду бяспечнікаў, але тыя «клюнулі на пакінутыя прынады-падманкі-генератары-бурнай-актыўнасці» і не сталі шукаць сапраўдныя «сюрпрызы».
Нагадаем, днём 17 красавіка «Кіберпартызаны» правялі маштабную атаку на «Гродна Азот» — буйное хімічнае прадпрыемства, у вытворчасці задзейнічаныя ў тым ліку выбухованебяспечныя рэчывы. Аб’яднанне заявіла, што былі ўзламаныя сістэмы аховы і камеры відэаназірання, парушаная праца кацельнага цэха. Таксама знішчаныя бэкапы базаў дадзеных, сервераў. Для аднаўлення дадзеных удзельнікі групоўкі запатрабавалі вызваліць палітвязняў.
