Праз 38 гадоў пасля чарнобыльскай катастрофы ў Брагіне Гомельскай вобласці фіксуецца высокі радыяцыйны фон: узровень забруджання больш чым у 2,5 разу вышэйшы за норму, расказала на прэс-канферэнцыі намесніца начальніка службы радыяцыйнага маніторынгу — начальніца аддзела радыяцыйнага маніторынгу Белгідрамета Зоя Трафімчык.
«[У Брагіне] фіксуецца забруджанне ў межах ад 0,5 да 0,56 мкЗв/г пры вызначанай мяжы для Беларусі 0,2 мкЗв/г», — назвала звесткі спецыялістка.
Нягледзячы на тое што гарадскі пасёлак Брагін, паводле класіфікацыі радыяцыйнага забруджання, размешчаны на тэрыторыях «з правам адсялення», там дагэтуль жыве больш за 4,5 тысячы чалавек.
Зоя Трафімчык адзначыла, што ўзровень радыяцыі ў Беларусі зніжаецца з нераўнамернай хуткасцю: у некаторых рэгіёнах гэты працэс хутчэйшы, чым у Брагіне.
Так, у Слаўгарадзе Магілёўскай вобласці за апошнія пяць гадоў узровень радыяцыі знізіўся на 10% — з 0,2 мкЗв/г да 0,18 мкЗв/г, то-бок цяпер ён недацягвае да акрэсленай мяжы.