У канале віцебскага ГУБАЗіКа «Северная столица» 7 лістапада з’явілася відэапаведамленне, якое было выдаленае праз секунду. Адміністратар канала выпадкова зняў сябе, потым зразумеў, што робіць, і выдаліў паведамленне. Увагу на гэта звярнула «Наша Ніва».
Паводле інфармацыі выдання, міліцыянта, які выдаў сябе, завуць Андрэй Прыстаўка. Яму 33 гады, і ён з Віцебска.
Андрэй доўгі час працаваў у аддзеле па наркакантролі і супрацьдзеянні гандлю людзьмі Першамайскага РУУС Віцебска. Паводле звестак супольнасці «Карнікі Беларусі», пасля выбараў 2020 года ён перакваліфікаваўся на палітычныя справы. І, відаць, пазней перайшоў у ГУБАЗіК.
Прыстаўка захапляецца спартыўнай стральбой з пнеўматычнай зброі. Ён рэгулярна займае прызавыя месцы па гэтай дысцыпліне на чэмпіянатах у Віцебску.
Як адзначае «Наша Ніва», канал віцебскага аддзялення ГУБАЗіКа — адзін з найменш брутальных. Відэа з затрыманымі там ужо даўно выкладваюцца без іх твараў і са змененым голасам, а кантэнт у асноўным складаецца з рэпостаў з іншых дзяржаўных каналаў.