Праз некалькі гадоў абмеркаванняў краіны Еўрасаюза нарэшце дамовіліся, што новая сістэма кантролю за ўездам і выездам грамадзян трэціх краін з ЕС (The Entry/Exit System, EES) нарэшце запрацуе гэтай восенню. Як менавіта гэта будзе выглядаць, мы ўжо расказвалі. Але канкрэтныя даты пакуль не называюцца. «Люстэрка» спытала ў памежных службаў суседніх з Беларуссю краін, калі яны плануюць пачаць прапускаць людзей па новых правілах.
Служба аховы дзяржаўнай мяжы Літвы (VSAT) адзначыла, што на гэты момант сістэма EES знаходзіцца «на падрыхтоўчым этапе».
— Вядзецца распрацоўка і тэставанне, а таксама актыўная падрыхтоўка да канчатковага запуску EES у кастрычніку 2025 года, — гаворыцца ў адказе «Люстэрку».
Пра афіцыйны старт сістэмы дзяржавы — чальцы ЕС абвесцяць пазней, дадала VSAT.
Дзяржаўная памежная ахова Латвіі тлумачыць, што будзе чакаць рашэння Еўракамісіі наконт даты запуску сістэмы. Аднак краіна паступова пачне ўкараняць яе ўжо ў другой палове 2025-га.
— Латвія разам з іншымі дзяржавамі-чальцамі папярэдне пачне паэтапнае ўкараненне EES у кастрычніку-лістападзе гэтага года, — адзначае Дзяржаўная памежная ахова.
Нагадаем, пра ўвядзенне EES загаварылі яшчэ ў 2016 годзе, але неаднаразова адкладалі старт працы. Гэтая сістэма мае замяніць сабой праверку ўручную, якая займае шмат часу, а таксама, паводле яе стваральнікаў, не забяспечвае надзейнага збору звестак пра перасячэнне мяжы і не дазваляе сістэматычна выяўляць падарожнікаў, якія перавысілі максімальны тэрмін дазволенага знаходжання.
У Еўрасаюзе разлічваюць, што EES будзе спрыяць недапушчэнню нелегальнай міграцыі, тэрактаў і іншых злачынстваў, а таксама дапаможа абараніць бяспеку грамадзян.
Чытайце таксама
