Падчас акупацыі Херсона расіяне звозілі целы сваіх загінулых салдат на тэрыторыю сметніка і, відавочна, спальвалі. Пра гэта піша The Guardian са спасылкай на мясцовых жыхароў і работнікаў смеццевага палігона.
Суразмоўцы выдання расказалі, што бачылі, як расіяне прывозілі на сметнік грузавікі, напоўненыя чорнымі мяшкамі, і падпальвалі іх. Пасля гэтага ў паветры стаяў моцны дым і жудасны пах.
Херсонцы і работнікі палігона мяркуюць, што такім чынам расіяне пазбаўляліся целаў сваіх салдат, якія загінулі падчас лютых баёў летам. Некаторыя з іх удакладнілі, што не бачылі саміх рэшткаў і не могуць дакладна сцвярджаць, належалі яны вайскоўцам або цывільным асобам.
Тэрыторыя самога сметніка падчас акупацыі была ачэпленая, мясцовых жыхароў да яе не падпускалі.
Работнікі палігона адзначаюць, што расіяне маглі замініраваць яго ці пакінуць там неразарваныя снарады.
The Guardian паведамляе, што колькасць атрыманых сведчаннях вылічваецца дзясяткамі, але падкрэслівае, што пакуль не можа пацвердзіць інфармацыю з незалежных крыніц. Украінскія ўлады не далі каментароў выданню з гэтай нагоды.
