У Міністэрстве абароны Расіі заявілі, што УСУ нясуць «значныя страты» на Паўднёва-Данецкім і Данецкім напрамках. Ва ўкраінскім Генштабе расказалі, што на Бахмуцкім напрамку расіяне спрабавалі наступаць у раёне Арэхава-Васільеўкі. У амерыканскім Інстытуце па вывучэнні вайны расказалі пра крокі Мінабароны Расіі ў рамках абвешчанай Шайгу рэструктурызацыі.
Расказваем пра галоўнае са зводак штабоў і высноваў экспертаў на 478-ы дзень вайны ва Украіне.
Генштаб УСУ: Пабілі два пункты кіравання праціўніка
За мінулыя суткі расійскія войскі нанеслі пяць ракетных, больш за 60 авіяцыйных удараў, а таксама правялі больш за 80 абстрэлаў з рэактыўных сістэм залпавага агню па пазіцыях украінскіх войскаў і населеных пунктах. Як паведамляе Генштаб УСУ ў ранішняй зводцы, ёсць загінулыя і параненыя сярод цывільнага насельніцтва, пашкоджаныя прамысловыя аб’екты ў Крывым Рогу Днепрапятроўскай вобласці, жылыя дамы і адміністрацыйная інфраструктура на Херсоншчыне.
— Войска Расіі канцэнтруе асноўныя намаганні на Ліманскім, Бахмуцкім, Аўдзееўскім і Мар'інскім напрамках — за мінулыя суткі адбылося 30 баявых сутыкненняў.
— На Северскім і Слабажанскім напрамках расійскія войскі нанеслі авіяцыйныя ўдары па трох населеных пунктах Чарнігаўскай вобласці. Правялі мінамётныя і артылерыйскія абстрэлы 23 населеных пунктаў Чарнігаўскай, Сумскай і Харкаўскай абласцей.
— На Купянскім напрамку праціўнік нанёс авіяўдар у раёнах Вясёлага і Бераставога Харкаўскай вобласці. Артылерыйскім і мінамётным абстрэлам падвергліся шэсць населеных пунктаў на Харкаўшчыне і Луганшчыне.
— На Ліманскім напрамку расійскія войскі вялі беспаспяховыя наступальныя дзеянні ў раёнах Стальмахоўкі на Луганшчыне і Выемкі, Вясёлага і Раздолаўкі ў Данецкай вобласці. Нанеслі авіяцыйны ўдар у раёнах трох населеных пунктаў, абстралялі восем населеных пунктаў Луганскай і Данецкай абласцей.
— На Бахмуцкім напрамку расіяне спрабавалі наступаць у раёне Арэхава-Васільеўкі. Нанеслі авіяцыйныя ўдары ў раёне трох населеных пунктаў Данецкай вобласці, абстралялі — 11.
— На Аўдзееўскім напрамку праціўнік нанёс авіяўдары ў раёне Аўдзееўкі. З артылерыі абстраляў раёны 14 населеных пунктаў Данецкай вобласці.
— На Мар'інскім напрамку УСУ адбілі ўсе атакі праціўніка ў раёнах Мар'інкі, Краснагораўкі і Новаміхайлаўкі. Расійскія войскі нанеслі авіяўдары каля пяці населеных пунктаў Данецкай вобласці, абстралялі з артылерыі шэсць населеных пунктаў.
— На Шахцёрскім напрамку расійскія войскі вялі наступальныя дзеянні ў кірунках Новаміхайлаўкі і Вадзянога Данецкай вобласці, але поспеху не мелі. Нанеслі авіяцыйныя ўдары ў раёнах Благадатнага і Залатой Нівы ў Данецкай вобласці. Абстралялі восем населеных пунктаў Данецкай вобласці.
— На Запарожскім і Херсонскім напрамках расійскія войскі працягваюць весці абарончыя дзеянні. Нанеслі авіяцыйны ўдар кіравальнымі авіяцыйнымі бомбамі ў раёне Казацкага Херсонскай вобласці. Абстралялі 30 населеных пунктаў Запарожскай, Херсонскай абласцей і горад Ачакаў Мікалаеўскай вобласці.
— Авіяцыя Сіл абароны за мінулыя суткі нанесла 13 удараў па раёнах канцэнтрацыі асабовага складу праціўніка.
— Знішчаныя 20 іранскіх ударных БПЛА тыпу Shahed-131/136, БПЛА аператыўна-тактычнага ўзроўню «Арлан-10» і яшчэ тры разведвальныя беспілотнікі.
— Падраздзяленні ракетных войскаў і артылерыі за мінулыя суткі пабілі два пункты кіравання, зенітна-ракетны комплекс С-300, чатыры раёны канцэнтрацыі асабовага складу і ваеннай тэхнікі праціўніка, тры склады боепрыпасаў і сем артылерыйскіх падраздзяленняў на агнявых пазіцыях.
Мінабароны Расіі: Перахопленыя чатыры HIMARS, знішчаныя 22 беспілотнікі
«Цягам сутак падраздзяленні УСУ працягвалі несці значныя страты падчас беспаспяховых спробаў вядзення наступальных дзеянняў на Паўднёва-Данецкім і Данецкім напрамках», — заявілі ў Міністэрстве абароны Расіі.
— На Урэмеўскім выступе найбольш актыўныя баявыя дзеянні ішлі ў раёнах населеных пунктаў Раўнаполь і Ураджайнае Данецкай вобласці, дзе падраздзяленні групоўкі войскаў «Усход» адбілі пяць атак падраздзяленняў УСУ. За суткі знішчаныя больш за 200 украінскіх вайскоўцаў, пяць танкаў, сем баявых машын пяхоты, пяць баявых браніраваных машын, чатыры аўтамабілі, а таксама дзве мінамётныя батарэі.
— На Данецкім напрамку актыўнымі дзеяннямі Паўднёвай групоўкі войскаў паспяхова адбітыя пяць атак УСУ ў раёнах населеных пунктаў Першамайскае, Пятроўскае і Стараміхайлаўка Данецкай вобласці. Падчас баёў знішчаныя да 215 украінскіх вайскоўцаў, тры баявыя браніраваныя машыны, пяць аўтамабіляў, а таксама дзве гаўбіцы Д-20. У раёне населенага пункта Наўгародскае Данецкай вобласці знішчаны склад боепрыпасаў 109-й брыгады тэрытарыяльнай абароны.
— На Купянскім напрамку ўдарамі авіяцыі, агнём артылерыі і актыўнымі дзеяннямі падраздзяленняў Заходняй групоўкі войскаў спыненая дзейнасць дзвюх украінскіх дыверсійна-разведвальных груп у раёне населенага пункта Навасёлаўскае Луганскай вобласці. За суткі знішчаныя да 45 украінскіх вайскоўцаў, дзве баявыя браніраваныя машыны, тры аўтамабілі, а таксама артылерыйская сістэма М777.
— На Чырвона-Ліманскім напрамку ўдарамі авіяцыі, агнём артылерыі групоўкі войскаў «Цэнтр» нанесенае паражэнне падраздзяленням УСУ ў раёнах населеных пунктаў Неўскае і Чырвоная Дзіброва Луганскай вобласці, а таксама Серабранскага лясніцтва. За суткі знішчаныя да 65 украінскіх вайскоўцаў, два бронетранспарцёры, два пікапы, самаходная артылерыйская ўстаноўка «Акацыя», а таксама гаўбіца Д-30.
— На Херсонскім напрамку ў выніку агнявога паражэння за суткі знішчаныя да 30 украінскіх вайскоўцаў, пяць аўтамабіляў, гаўбіца «Мста-Б», а таксама артылерыйская сістэма М777.
Усяго за суткі, паводле МА РФ, нанесенае паражэнне 96 артылерыйскім падраздзяленням, жывой сіле і ваеннай тэхніцы УСУ ў 104 раёнах. Перахопленыя чатыры рэактыўныя снарады сістэмы залпавага агню HIMARS. Знішчаныя 22 украінскія беспілотныя лётныя апараты.
Інстытут па вывучэнні вайны: Захад можа перадаць Украіне знішчальнікі F-16 і танкі Leopard у найбліжэйшыя месяцы
Украінскія сілы працягвалі контрнаступальныя аперацыі як мінімум на трох напрамках і, як паведамляецца, 15 чэрвеня дамагліся поспехаў, адзначае ў свежай справаздачы амерыканскі Інстытут па вывучэнні вайны (ISW). Прадстаўнік Генштаба Украіны Аляксандр Штапун паведаміў, што ўкраінскія сілы правялі паспяховыя наступальныя аперацыі на поўнач і паўночны захад ад Бахмута. Прэс-цэнтр Украінскай групы войскаў «Таўрыйск» паведаміў, што ўкраінскія сілы прасунуліся да аднаго кіламетра ў заходняй частцы Данецкай вобласці і працягваюць спробы палепшыць свае тактычныя пазіцыі ў раёне Вуглядара (30 км на паўднёвы захад ад Данецка). Расійскія блогеры сцвярджалі, што ўкраінскія войскі беспаспяхова атакавалі на паўднёвы захад і поўдзень ад Арэхава на захадзе Запарожскай вобласці і нарошчваюць тэмп контрнаступальных аперацый у гэтым раёне ў сувязі з паляпшэннем умоваў надвор’я. Намеснік начальніка Галоўнага аператыўнага ўпраўлення Генштаба Украіны генерал Аляксей Громаў паведаміў, што ўкраінскія сілы прасунуліся да 3 км у раёне Малой Такмачкі на захадзе Запарожскай вобласці і да 7 км у раёне Вялікай Навасёлкі на захадзе Данецкай вобласці і вызвалілі сем населеных пунктаў у гэтых раёнах з пачатку контрнаступальных аперацый. Аднак дарадца Офіса прэзідэнта Украіны Міхаіл Падаляк заявіў 15 чэрвеня, што ўкраінскія сілы яшчэ не пачалі контрнаступленне «як такое», але прызнаў, што ўкраінскія сілы вядуць наступальныя дзеянні, што, імаверна, азначае, што УСУ яшчэ не задзейнічалі свае асноўныя сілы.
Расійскія ўзброеныя сілы пачалі работы па фармаванні новых корпусных і армейскіх злучэнняў у рамках абвешчанай міністрам абароны Сяргеем Шайгу буйнамаштабнай рэструктурызацыі арміі, якую ён збіраецца завяршыць да 2026 года. Як адзначаюць эксперты, у сярэдзіне траўня незалежныя заходнія разведвальныя аналітыкі пачалі паведамляць, што расійскія вайсковыя ўлады актыўна вярбуюць афіцэраў і прызыўнікоў з Бураціі і Іркуцка для ўкамплектавання новай 25-й агульнавайсковай арміі. Паведамляецца, што штаб арміі будзе базавацца ў Екацярынбургу Свярдлоўскай вобласці. ISW таксама паведамляў 3 чэрвеня, што Расія фармуе 40-ы армейскі корпус у складзе Паўднёвай вайсковай акругі і актыўна спрабуе ўкамплектаваць адзін з мотастралковых батальёнаў гэтага корпуса.
Застаецца незразумелым, як расійскія ўлады збіраюцца ўкамплектоўваць злучэнні корпуснага і армейскага ўзроўню, улічваючы хранічныя праблемы, з якімі сутыкаюцца УС РФ. Гэтыя фарміраванні могуць быць часткова прызначаныя для інтэграцыі шэрагу спецыяльных добраахвотніцкіх фарміраванняў, створаных падчас вайны ва Украіне, хоць папярэдняя спроба Расіі інтэграваць добраахвотніцкія батальёны летам 2022 года не дала моцных станоўчых вынікаў, адзначаюць эксперты.
Кіраўнік Чачэнскай Рэспублікі Рамзан Кадыраў накіраваў чачэнскі спецназ «Ахмат» у памежныя раёны Белгародскай вобласці ахоўваць мяжу ад уварванняў на тэрыторыю Расіі. Кадыраў падкрэсліў, што сілы «Ахмата» будуць дзейнічаць у тандэме з іншымі расійскімі сіламі для абароны Белгародскай вобласці і жыхароў іншых памежных раёнаў. Кадыраў, імаверна, імкнецца стварыць уражанне, што ён і чачэнскія сілы супрацоўнічаюць з Мінабароны, у адрозненне ад кіраўніка ПВК Вагнера Яўгена Прыгожына, які раней пагражаў увесці сілы Вагнера ў Белгародскую вобласць без дазволу Мінабароны Расіі ці расійскага вайсковага камандавання.
На што яшчэ звярнулі ўвагу эксперты:
- заходнія дзяржавы могуць перадаць Украіне знішчальнікі F-16 і дадатковыя танкі Leopard у найбліжэйшыя месяцы;
- расійскія войскі працягвалі абмежаваныя наступальныя дзеянні на рубяжы Купянск — Сватава — Крамянная;
- украінскія і расійскія войскі правялі наземныя атакі ў раёне Бахмута, і па стане на 15 чэрвеня расійскія сілы адваявалі тэрыторыю;
- паведамляецца, што ўкраінскія і расійскія сілы працягвалі абмежаваныя наземныя атакі на лініі Аўдзееўка — Данецк;
- расійскія і ўкраінскія войскі вялі наступальныя аперацыі на захадзе Данецкай вобласці;
- расійскія крыніцы сцвярджалі, што ўкраінскія сілы працягвалі наступальныя аперацыі на захадзе Запарожскай вобласці;
- паведамляецца, што ўкраінскія партызаны зладзілі дыверсію на чыгунцы ў акупаваным Мелітопалі, хоць ISW не знайшоў ні візуальнага пацверджання, ні расійскага пацверджання атакі.