Маці Аляксея Навальнага Людміле паказалі цела сына. Пра гэта яна расказала ў відэа, якое апублікавалі 22 лютага на канале палітыка.
21 лютага Людміла Навальная была адна ў Следчым камітэце Саляхарда. Толькі на наступны дзень дапусцілі адваката.
— Следчыя сцвярджаюць, што прычына смерці вядомая, у іх ёсць усе дакументы. Па законе яны мусілі адразу аддаць мне цела Аляксея, але яны не зрабілі гэтага дагэтуль. Замест гэтага яны шантажуюць мяне і ставяць умовы, дзе, калі і як мусіць быць пахаваны Аляксей. Гэта незаконна.
Яны хочуць зрабіць гэта таемна, без развітання. Яны хочуць прывезці мяне на ўскраіну могілак, да свежай магілы, і сказаць: «Тут ляжыць ваш сын». Я на гэта не згодная. Я хачу, каб і ў вас, каму Аляксей дарагі, была магчымасць з ім развітацца, — сказала маці палітыка.
Людміла Навальная падкрэсліла, што запісала відэа, бо ёй пачалі пагражаць.
— Гледзячы мне ў вочы, яны кажуць, што, калі я не пагаджуся на таемнае пахаванне, яны нешта зробяць з целам майго сына. Следчы Варапаеў адкрыта мне сказаў: «Час працуе не на вас, трупы раскладаюцца». Я не хачу асаблівых умоваў, я толькі хачу, каб усё было зроблена па законе. Я патрабую аддаць мне цела сына неадкладна, — сказала Людміла Навальная.
Прэс-сакратар Навальнага Кіра Ярмыш у X напісала, што маці палітыка паказалі медыцынскае заключэнне пра смерць Аляксея. У дакуменце сказала, што «прычыны смерці — натуральныя».
Нагадаем, 16 лютага ФСВП Расіі паведаміў пра смерць палітвязня Аляксея Навальнага. У паведамленні гаворыцца, што ён памёр у калоніі пасля прагулкі. Следчы камітэт РФ арганізаваў працэсуальную праверку па факце смерці апазіцыянера. 19 лютага следчыя сказалі адвакатам і маці Аляксея, што не выдадуць цела. З ім яшчэ 14 дзён будзе праводзіцца нейкая «хімічная экспертыза».