У Крупскім раёне супрацоўнікі АМАП падчас затрымання выкарысталі зброю на паражэнне. Відэа інцыдэнту апублікавала 21 лістапада прэс-служба МУС.
У ведамстве расказалі, што ў міліцыю паступіла аператыўная інфармацыя: «У адным з дамоў вёскі Вялікі Лес Крупскага раёна знаходзіцца група ўзброеных людзей».
«У 8.10 супрацоўнікі 10-га ўпраўлення (па Мінскай вобласці) ГУБАЗіК МУС і АМАП УУС Мінаблвыканкама прыбылі па названым адрасе. У жыллі знаходзіўся 62-гадовы гаспадар дома з двума сынамі. Мужчыну і старэйшага, 36-гадовага, затрымалі. А малодшы, 19-гадовы, выйшаў на супрацоўнікаў з двума нажамі, выказваючы пагрозы», — паведамілі ў МУС, адзначыўшы, што на «неаднаразовыя патрабаванні» пакласці нажы на падлогу хлопец не рэагаваў.
Паводле звестак сілавікоў, адзін з аператыўнікаў «зрабіў папераджальны стрэл, пасля чаго была выкарыстаная зброя на паражэнне».
«Мужчына шпіталізаваны. На месцы працуе следча-аператыўная група», — дапоўнілі ў МУС.
Ці была знойдзена ў доме якая-небудзь зброя акрамя нажоў, у прэс-рэлізе МУС не паведамляецца.