Прычынай гібелі чацвярых дзяцей у Краснаярскім краі Расіі, якія ў верасні памерлі пасля сямейнай вячэры, стала вострае атручанне інсектыцыдам. Абвінавачанне выставілі іх бацьку, які распыліў у доме дыхлафос, але не прыбраў і не выветрыў памяшканне перад вячэрай, паведамляе Следчы камітэт РФ.
Як высветліла экспертыза, чацвёра дзяцей памерлі ў выніку вострага атручання дэструктыўнай атрутай (інсектыцыдамі) сістэмнага дзеяння.
«З улікам сабраных падчас следства доказаў і праведзеных экспертыз следства выявіла, што прычына гібелі дзяцей — траплянне кампанентаў інсектыцыднага сродку ў арганізм дзяцей», — паведамілі ў ведамстве.
34-гадовага бацьку загінулых дзяцей абвінавацілі ў прывядзенні да смерці па неасцярожнасці (ч. 3 арт. 109 КК РФ).
Высветлілася, што ўвечары перад вячэрай мужчына распыліў у доме дыхлафос, але праігнараваў рэкамендацыі вытворцы наконт ахоўных мер. Пасля апрацоўкі трэба было доўга ветрыць памяшканне і правесці вільготную ўборку, але бацька гэтага не зрабіў і дазволіў дзецям сесці за стол.
Мужчыну пагражае да чатырох гадоў пазбаўлення волі. Ён ужо прызнаў віну.
Нагадаем, трагедыя здарылася у пасёлку Чырвоная Сопка Краснаярскага краю РФ. 20 верасня сям’я з шасці чалавек павячэрала пельменямі і курыцай, а раніцай звярнулася ў бальніцу. Цягам двух дзён чацвёра дзяцей ва ўзросце ад 6 да 13 гадоў памерлі, бацькі выжылі.
Спачатку разглядалася версія атручання прадуктамі, потым — аэразольным прэпаратам ад насякомых.
Маці на момант здарэння была на дзявятым месяцы цяжарнасці. У пачатку лістапада ў мужа і жонкі нарадзіўся хлопчык, сям’я пераехала ў іншае сяло да сваякоў.
