Святлана Ціханоўская ў інтэрв'ю «Украінскай праўдзе» расказала, што не можа цяпер прыехаць у Кіеў як прыватная асоба, каб падтрымаць украінцаў.
— Я гатовая прыехаць у Кіеў, калі кіеўскі бок будзе гатовы мяне прыняць, — адказала Ціханоўская на адпаведнае пытанне, удакладніўшы, што гэта можа быць не толькі прэзідэнт Зяленскі, але і яго адміністрацыя.
Пры гэтым лідар беларускіх дэмакратычных сілаў патлумачыла, чаму яе паездка не можа адбыцца без адпаведнага запрашэння.
— Глядзіце, са мной сітуацыя крыху складанейшая. Нашы прадстаўнікі могуць прыехаць. Але вы мусіце разумець, што я знаходжуся пад аховай літоўскай дзяржавы. І для таго каб я змагла выехаць у Кіеў, літоўскі бок павінен забяспечыць бяспеку. Таму што ў мяне тут дыпламатычны статус. І пакуль не будзе афіцыйнага запрашэння ад прэм’ер-міністра або ад прэзідэнта, яны проста не могуць гэты візіт арганізаваць.
Я знаходжуся ў такім становішчы. Гэта не тое, што я ўзяла, захацела, выехала.
Неабавязкова арганізоўваць маю асабістую сустрэчу. Гэта можа быць сустрэча шматбаковая, у складзе нейкай дэлегацыі, альбо польская, альбо літоўская, альбо эстонская. Я думаю, нашы палітычныя саюзнікі з радасцю гэта зрабілі б. Але тут мусіць быць усё ж такі запыт афіцыйны, — расказала Ціханоўская.
Паводле яе словаў, Офіс прэзідэнта Украіны пакуль не адрэагаваў на яе публічны зварот да Зяленскага і яна разумее, чаму.
— Калі мы гаворым пра самы высокі ўзровень, пра прэзідэнта, то Украіна займае асцярожную пазіцыю што да камунікацыі з дэмакратычнымі сіламі Беларусі, таму што ўсё-такі вы ў стане вайны. І любы няправільны крок, як здаецца адміністрацыі Зяленскага, можа выклікаць неабдуманыя крокі з боку Лукашэнкі. Але вайна ж усё роўна скончыцца, яна скончыцца перамогай Украіны. І цяпер, не наладжваючы кантактаў з дэмакратычнай Беларуссю, такое меркаванне будзе ў беларусаў, што Украіна будзе гатовая далей супрацоўнічаць з Лукашэнкам, які такі ж агрэсар.
— -
У інтэрв'ю Святлана Ціханоўская таксама адзначыла, што для яе было шокам і нечаканасцю тое, як з пачаткам вайны ва Украіне рэзка памянялі стаўленне да беларусаў.
— Мы ж жылі ў сваім свеце, у свеце рэвалюцыі, негатыўнага стаўлення да рэжыму, хацелі гэты рэжым зрынуць, і нам здавалася, што ўкраінцы, найбліжэйшыя суседзі, добра разумеюць, што адбываецца. А потым пачалася вайна, і мы зразумелі, што людзі ва Украіне зусім не ведаюць пра нашую барацьбу, пра тысячы людзей у турмах, не ведаюць пра тое, што колькасць палітвязняў павялічваецца кожны дзень. Зноўку даводзілася адкрываць беларусаў і Беларусь для Украіны. Было вельмі складана, улічваючы эмацыйны фон, улічваючы, што Беларусь стала суагрэсарам у вачах украінцаў. І адразу ўсе беларусы пайшлі пад адзін грэбень, — адзначыла яна.
Ціханоўская заявіла, што пасварыць украінцаў і беларусаў — гэта менавіта тое, чаго дамагаецца Пуцін і чаго хоча Лукашэнка.
— Для іх вельмі важна, каб мы перасварыліся, і тады наогул усё будзе выдатна. Цяпер не час высвятляць адносіны. Цяпер час супрацоўнічаць, таму што вораг у нас адзін. Вораг у нас — Расійская імперыя, і нам трэба выходзіць з-пад яе ўплыву, — заявіла Ціханоўская.
— Я вельмі спадзяюся, што ўкраінцы, якія так усхвалялі Лукашэнку ўсе гэтыя гады, таму што не разумелі, што адбываецца, ужо ніколі не вернуцца да наратыву «ў Беларусі вуліцы чыстыя і малако смачнае», — дадала яна.