Следчы камітэт пачаў працэс спецыяльнай вытворчасці ў дачыненні да буйнога полацкага бізнесоўца Уладзіміра Захарава, паведамляе прэс-служба ведамства.
СК пачаў спецвытворчасць 12 красавіка. Бізнесоўца абвінавачваюць па некалькіх артыкулах Крымінальнага кодэкса:
- ч. 3 арт. 243 (Ухіленне ад выплаты падаткаў у асабліва буйным памеры);
- ч. 2 арт. 243−1 (Ухіленне ад выканання абавязкаў падатковага агента па пералічэнні падаткаў у асабліва буйным памеры);
- ч. 1 арт. 243−3 (Ухіленне ад выплаты страхавых унёскаў);
- арт. 369−1 (Дыскрэдытацыя Рэспублікі Беларусь).
Мужчыну прапануюць з’явіцца ва УСК па Віцебскай вобласці.
Хто такі Уладзімір Захараў
Уладзіміру Захараву належала большая частка гандлёвых плошчаў у Полацку і Наваполацку. Гэта буйныя гандлёвыя цэнтры, гіпермаркет, рынак «Стралецкі». Раней Захараў валодаў тэлеканалам «Квант» і газетай «Інфарм-плюс», лікёрагарэлачным заводам «Вінрэал».
Пра Захарава таксама вядома, што ён прафесійны гулец у покер, пераможца міжнародных турніраў.
У 2020 годзе Полацкі райвыканкам звярнуўся да Уладзіміра Захарава з просьбай знізіць арэндную плату ў сувязі з «наяўнай эпідэміялагічнай сітуацыяй» з прычыны каранавіруса. Тады прадпрымальнік адказаў уладам смела і даволі рэзка.
«Калі з гэтага вы хоць нешта зробіце, тады мы лёгка зможам знізіць арандатарам іх абавязанні перад намі. У цяперашніх умовах вашай бяздзейнасці гэта немагчыма. Не таму, што мы гэтага не хочам, а таму, што вы нічога не робіце», — адзначаў у сваім адказе Уладзімір Захараў.
Бізнесовец тады пацвердзіў TUT.BY, што сапраўды адправіў такі адказ Полацкаму райвыканкаму.
— За тое, што цяпер адбываецца [сітуацыя з каранавірусам], мы перажываем не менш, чым улады. Мы не хочам на гэтым зарабляць. Я так адказаў, бо ўжо накіпела. Разам з тым гэты адказ не антыподны. Улады павінныя зрабіць хаця б тое элементарнае, што напрошваецца само сабой. Гэта я і адзначыў у пяці пунктах у лісце. Калі мы [бізнес і ўлада] не будзем цяпер рабіць нешта разам, нічога не атрымаецца, — заяўляў бізнесовец.
Чытайце таксама
