Беларус Рыгор Алексіевіч, які знаходзіцца ў Клайпедзе, абвясціў галадоўку 8 верасня. Ён называе гэта акцыяй супраць блакавання ў Літве аўтамабіляў, за якія беларусы заплацілі, але вывезці ў нашую краіну не могуць. Мужчына ўпэўнены, што мытня суседняй краіны дзейнічае незаконна, піша «Белсат».
«Гэтыя аўтамабілі, большасць з іх, і мой таксама, былі набытыя да ўвядзення санкцый супраць Беларусі, а менавіта — 1 ліпеня 2024 года. Тое, што нашыя машыны затрыманыя, лічу абуральным беззаконнем. Я страціў надзею знайсці рашэнне сітуацыі, я пабываў ва ўсіх інстанцыях, і адзіным выхадам бачу галадоўку пратэсту», — сказаў ён.
Алексіевіч запэўніў, што з заўтрашняга дня ў любы момант можа здаць аналізы, каб даказаць адмову ад ежы:
«Я буду галадаць максімальна доўга, колькі хопіць сіл. Калі ў некага ўзнікнуць сумненні, я ў любы момант пасля першых сутак ад пачатку галадоўкі, то-бок з 9 верасня, гатовы здаць аналізы крыві на тое, што ў мяне не хапае глюкозы ў крыві».
Беларус таксама заклікаў да разумення «нашых літоўскіх братоў і сясцёр» і заявіў, што «такая палітыка губіць давер да Літвы».
«У Клайпедскі порт канчаткова перастануць прыходзіць грузы, порт прыходзіць у заняпад, людзі страчваюць працоўныя месцы. Калі ласка, вазьміце актыўны ўдзел у нашай акцыі, мы вельмі спадзяемся на вашае разуменне і падтрымку», — падсумаваў Рыгор Алексіевіч.
Нагадаем, раней літоўская мытня зрабіла яшчэ больш жорсткімі ўмовы, пры якіх набыты на тэрыторыі ЕС аўтамабіль можна вывезці ў Беларусь: з 4 чэрвеня гэта можа зрабіць толькі ўладальнік набытай машыны. Усе астатнія павінныя паказаць на ўсе аўто, якія ўвозяцца ў Беларусь, абавязанні экспарцёра і атрымальніка тавару наконт таго, што тавар не прызначаны для расійскага рынку, даведку пра канчатковага пакупніка і пра тое, дзе будзе выкарыстоўвацца аўтамабіль, а таксама цягам 40 дзён пасля перасячэння мяжы паказаць копію мытнай дэкларацыі, якая пацвярджае, што аўтамабіль размытнілі не ў Расіі.
Паводле неафіцыйных звестак, у порце ў Клайпедзе захрасла каля 4 тысяч машын, якія належаць беларусам. Транспартныя сродкі стаяць на платнай паркоўцы, за захаванне патрабуюць ад 5 да 20 еўра штодня.